علشان العيد بالفول علفونى.. وبحبل من رقبتى جرونى.. فرحوا العيال بشكلى وحبونى.. رايحين جايين كده بيلاعبونى.. سمونى «سعد» قال بيدلعونى.. لأجل بعد الوقفة هايدبحونى.. أشكى لمين وأحكى همومى..

دول قسموا وسطى وركبونى.. قلت أعتصم يمكن يغيثونى.. أو أمأمأ لهم جايز يسيبونى.. فكرت أنطح وأخد حقوقى.. خفت على قرونى ليعلقونى..

 أجيب بتوع حقوق الحيوان.. ولا على البوكس هايشدونى.. لا مظاهرة هاتجيب لى الحرية.. لا ليك جابتها ولا ليه.. الحبل على رقبتى وملفوف.. مدبوح كده زيك مدبوح.. ناس متشمرين مسكين سكاكين.. على الدبح جاهزين لى وناويين..

 شاطرين تسنوا لى فى سنانكم.. لأجل تمصمصونى مع جيرانكم.. بس كده خليكوا فاكرين.. الضانى مؤذى كله سمين.. وكل سنة وأنتم قاعدين.. تدبحوا فينا يارب آمين.

فاروق على متولى- السويس