كيف يصبح المليون جنيه مليار جنيه في عدة سنوات؟! أرجو من السادة رجال الاقتصاد في حكومة المحروسة أن يجيبوا عن هذا السؤال ومنهم الذين هاجموا شركات توظيف الأموال بدعوي أنه يستحيل منح المودعين نسبة ٢٠% عائد أرباح لأموالهم لأن هذا الربح غير معقول
ويتنافي مع قواعد الاقتصاد الحر وغير الحر، طيب هذا الكلام جميل وصدقناه ساعتها لكن يبقي السؤال المحير اللي دوخ دماغ حضرتنا ومدوخ دماغ شعب المحروسة هو كيف استطاع بعض رجال الأعمال من كبار المسؤولين في المحروسة مضاعفة رأسمالهم بنسبة تصل إلي ألف في المائة،
يعني المليون عمل مليار في بضع سنوات، وبالطبع إحنا مش ح نسأل عن المليون الأولاني جابوه إزاي بفرض إننا شعب حسن النية. لكن إذا كانوا إخوانا بتوع شركات توظيف الأموال علي خطأ والسادة جهابذة الاقتصاد والمال أقنعونا بأن الجنيه مستحيل يعمل عشرين قرش ربح وإن ده نصب واحتيال..
طب إخوانا إياهم عملوا من الجنيه عشرة ومية وألف جنيه إزاي؟ سؤال برئ من مواطن ضاعت فلوسه في شركات توظيف الأموال!.. إزاي الناس دي بقي عندهم مليارات مع إن الجنيه ما بيعملش عشرين قرش أرباح ولا فيه سكة تانية الجنيه بيروح فيها وبيتضخم وبيتفيل يعني يبقي زي الفيل لا مؤاخذة ولا حد يقدر يقف قصاده.. ليه دائماً فلوس الغلابة بتحكمها قواعد الاقتصاد وفلوس اللي بالي بالك مالهاش قواعد ولا حتي اقتصاد؟!
فهمونا المليارات دي جت إزاي ومنين.. لحسن نافوخي ح ينفجر؟! حسرة علي فلوسي اللي ضاعت!!.. جاوبوني ياجهابذة الاقتصاد في حكومة المحروسة لما الجنيه مابيعملش عشرين قرش مكسب، طيب.. إزاي عمل ألف جنيه مع أصحابنا إياهم ربنا يعزكم كمان وكمان.. آه يانفوخي.. ناوليني يابنتي حباية الضغط!
سعيد أباظة
* المليار ابن حرام.. بيجي لما السلطة تشمي علي حل شعرها مع الواد «مليون»!
